ឯកឧត្តម នាយឧត្តមសេនីយ៏ នាង ផាត ជួបអនុរដ្ឋមន្ត្រីការពារប្រទេសឡាវ - ព័ត៌មានក្នងស្រុក

ព័ត៌មាន

ឯកឧត្តម នាយឧត្តមសេនីយ៏ នាង ផាត ជួបអនុរដ្ឋមន្ត្រីការពារប្រទេសឡាវ

ក្នុងឱកាសចូលជួបសំដែងការគួរសមនិងពិភក្សាការងារជាមួយ ឯកឧត្តម នាយឧត្តមសេនីយ៏ នាង ផាត រដ្ឋលេខាធិការក្រសួងការពារជាតិកាលពីរសៀលថ្ងៃទី១៧ ខែឧសភា ឆ្នាំ ២០១៧ ឯ.ឧ ឧ/ទោ អេសម័យ លឿងវ៉ាន់សៃអនុរដ្ឋមន្ត្រីក្រសួងការពារប្រទេសនៃសាធារណរដ្ឋប្រជាធិបតេយ្យប្រជាជនឡាវនិងប្រតិភូបានថ្លែងអំណរគុណចំពោះក្រសួងការពារជាតិកម្ពុជាដែលបានយកចិត្តទុកដាក់និងផ្ដល់ឱកាសដល់ដំណើរទស្សនកិច្ចរបស់ប្រតិភូ ឯកឧត្តម ក្នុងព្រះរាជាណាចក្រកម្ពុជាទទួលបានជោគជ័យ ។
ឯ.ឧ អេសម័យ លឿងវ៉ាន់សៃ បានជំរាបដល់ ឯ.ឧរដ្ឋលេខាធិការថា៖ក្នុងដំណើរទស្សនកិច្ចរបស់ប្រតិភូឯ.ឧនាពេលនេះគឺនាំមកនាំមកនូវការពង្រឹងនិងពង្រីកសាមគ្គីភាពមិត្តភាពនិងកិច្ចសហប្រតិបត្តិការរវាងកងទ័ពទាំង២កម្ពុជា-ឡាវអោយកាន់តែរឹងមាំថែមទៀត។ដោយកន្លងមកកងទ័ពយើងទាំង២បានបង្ហាញតាមរយៈការធ្វើកិច្ចសហប្រតិបត្តិការជាមួយគ្នាក្នុងការកសាង និង បណ្តុះបណ្តាលធនធានមនុស្សក្នុងជួរកងទ័ព។
ឯ.ឧបានបញ្ជាក់បន្ថែមទៀតថា៖ក្នុងដំណើរទស្សនកិច្ចរបស់ប្រតិភូ ឯ.ឧ នាពេលនេះគឺបានឃើញព្រះរាជាណាចក្រកម្ពុជាកំពុងមានការរីកចំរើនយ៉ាងខ្លាំងតាមរយៈការអភិវឌ្ឍន៏ប្រទេសរបស់ខ្លួនដែលស្ថិតក្នុងស្ថានភាពប្រទេសមានសន្តិភាពនិងមានស្ថេរភាពនយោបាយ។ ទន្ទឹមនឹងនេះឯ.ឧ អេសម័យ លឿងវ៉ាន់សៃមានជំនឿយ៉ាងមុតមាំថា៖តាមរយៈការបង្កើននូវកិច្ចសហប្រតិបត្តិការរវាងកងទ័ពទាំង២កម្ពុជា-ឡាវនោះទៅថ្ងៃអនាគតនឹងមានការអភិវឌ្ឍន៏,មានការរីកចំរើនហើយកាន់តែរឹងមាំជាបន្ត បន្ទាប់។ហើយយើងនឹងខិតខំដោះស្រាយបញ្ហាព្រំដែនរវាងប្រទេសយើងទាំង២ដោយសន្តិវិធីផងដែរ ។
ឯ.ឧ នាយឧត្តមសេនីយ៏ នាង ផាតថ្លែងជួសមុខឱ្យថ្នាក់ដឹកនាំក្រសួងការពារជាតិនិងខ.ភ.មទាំងអស់បានថ្លែងនូវការស្វាគមន៍ចំពោះដំណើរទស្សនកិច្ចរបស់គណៈប្រតិភូព្រមទាំងជូនពរអោយទទួលបានជោគជ័យក្នុងដំណើរទស្សនកិច្ចរបស់ខ្លួនលើទឹកដីព្រះរាជាណាចក្រកម្ពុជា។ក្នុងឱកាសនោះផងដែរឯ.ឧក៏បានលើកឡើងនូវស្មារតីសាមគ្គីភាពមិត្តភាពនិងកិច្ចសហប្រតិបត្តិការកាន់តែរឹងមាំរវាងរដ្ឋាភិបាល,កងទ័ពនិងប្រជាជននៃប្រទេសទាំង២កម្ពុជា-ឡាវដែលក្រសួងការពារជាតិយើងទាំង២បានធ្វើកិច្ចសហប្រតិបត្តិការទៅវិញទៅមកតាំងពីយូរឆ្នាំណាស់មកហើយ។តាមរយៈការជួយឧបត្ថម្ភគាំទ្រទាំងស្មារតីសំភារៈនិងការជួយបណ្ដុះបណ្ដាលធនធានមនុស្សនិងការផ្លាស់ប្តូរគណៈប្រតិភូទៅវិញទៅមករវាងកងទ័ពយើងទាំង២កន្លងមក ឯ.ឧបានបញ្ជាក់ថានេះគឺជាការចូលរួមចំណែកក្នុងការធ្វើកំណែរទំរង់របស់ខ.ភ.មស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជាប្រមុខដឹកនាំ ៕