កិច្ចប្រជុំឆ្លងសេចក្តីព្រាងរបាយការណ៍បូកសរុបការងារខែ ឧសភា និងទិសដៅអនុវត្ត ខែមិថុនា ឆ្នាំ២០១៧ - ព័ត៌មានក្នងស្រុក

ព័ត៌មាន

កិច្ចប្រជុំឆ្លងសេចក្តីព្រាងរបាយការណ៍បូកសរុបការងារខែ ឧសភា និងទិសដៅអនុវត្ត ខែមិថុនា ឆ្នាំ២០១៧

កិច្ចប្រជុំឆ្លងរបាយការណ៍បូកសរុបការងារខែឧសភា និងទិសដៅអនុវត្តខែមិថុនា ឆ្នាំ២០១៧ បានប្រព្រឹតទៅនាព្រឹកថ្ងៃទី៣១ ខែឧសភា ក្រោមអធិបតីភាព ឯកឧត្តម នាយឧត្តមសេនីយ៍ ចាយ សាំងយុន រដ្ឋលេខាធិការ ក្រសួងការពារជាតិ និងមានការអញ្ជើញចូលរួមពីសំណាក់ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គមេបញ្ជាការរងនៃខ.ភ.ម អគ្គនាយក អគ្គនាយករងអគ្គនាយកដ្ឋាន,នាយក នាយករងនាយកដ្ឋាននិងស្ថាប័នចំណុះក្រសួងការពារជាតិ អគ្គបញ្ជាការដ្ឋាននៃខ.ភ.មជាច្រើនរូបទៀត។
ក្នុងរបាយការណ៍បូកសរុបបានឲ្យដឹងថាក្នុងខែឧសភាឆ្នាំ២០១៧កន្លងទៅនេះខ.ភ.មបានបន្តពង្រឹងខឿនការពារជាតិនៅតាមតំបន់ព្រំដែននិងបណ្តាកោះមួយចំនួនកែសម្រួលកម្លាំងការពារព្រំដែន ធ្វើការតាមដានក្តាប់នូវរាល់សភាពការណ៍ប្រែប្រួល និងធ្វើការល្បាតត្រួតពិនិត្យការពារភូមិសាស្ត្រទទួលខុសត្រូវរបស់ខ្លួនជាប់ជាប្រចាំព្រមទាំងបានបន្តកិច្ចសហប្រតិបត្តិការល្អជាមួយប្រទេសជិតខាង ដោះស្រាយបញ្ហាផ្សេងៗដែលកើតឡើងដោយសន្តិវិធី។ ទន្ទឹមនឹងនេះបានម្ចាស់ការ និងសហការចូលរួមពង្រឹងការអនុវត្តច្បាប់ កសាងភូមិ-ឃុំមានសុវត្ថិភាព ធ្វើការបង្ការនិងបង្រាបនូវរាល់បទល្មើសគ្រប់ប្រភេទ ភាពអនាធិបតេយ្យនានា ការពារសន្តិសុខ សណ្តាប់ធ្នាប់សាធារណៈ ការពារគណៈប្រតិភូជាតិ និងអន្តរជាតិនានាបានល្អប្រសើរ ពិសេសចូលរួមសហការការពារសន្តិសុខ ការឃោសនាបោះឆ្នោតក្រុមប្រឹក្សាឃុំសង្កាត់អាណត្តិទី៤ ។
ទន្ទឹមនឹងនេះ អង្គប្រជុំបានពិភាក្សាផ្លាស់ប្តូរយោបល់ដោយមានយកចិត្តទុកដាក់ខ្ពស់ទៅលើផែនការទិសដៅអនុវត្តខែមិថុនា ឆ្នាំ២០១៧ ក្នុងនោះការយកចិត្តទុកដាក់រក្សាការពារសន្តិសុខឲ្យបានល្អ ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤ នាថ្ងៃទី៤ ខែមិថុនា ឆ្នាំ២០១៧ និងពង្រឹងការគ្រប់គ្រង ដឹកនាំបញ្ជា និងបង្រឹងស្មារតីយោធិននៅក្នុងការគោរពច្បាប់នានារបស់រដ្ឋ ព្រមទាំងធ្វើការកែលម្អនិងពង្រឹងគុណភាពការងារគ្រប់វិស័យ ដើម្បីឈានទៅសម្រេចស្នាដៃថ្មីៗចំពោះមុខថែមទៀតជូនជាតិមាតុភូមិ៕