ឯកឧត្តម នាយឧត្តមសេនីយ៏ ទៀ បាញ់ ប្រជុំផ្សព្វផ្សាយខួប៤០ឆ្នាំនៃដំណើរឆ្ពោះទៅរកការផ្តួលរំលំរបបប្រល័យពូជសាសន៍ ប៉ុលពត - ព័ត៌មានក្នងស្រុក

ព័ត៌មាន

ឯកឧត្តម នាយឧត្តមសេនីយ៏ ទៀ បាញ់ ប្រជុំផ្សព្វផ្សាយខួប៤០ឆ្នាំនៃដំណើរឆ្ពោះទៅរកការផ្តួលរំលំរបបប្រល័យពូជសាសន៍ ប៉ុលពត

ក្រសួងការពារជាតិ បានប្រជុំផ្សព្វផ្សាយទិវានៃការចងចាំ នៃដំណើរឆ្ពោះទៅរកការផ្តួលរំលំរបបប្រល័យពូជសាសន៍ ប៉ុលពតដែលពិធីនេះបានប្រព្រឹតទៅនាថ្ងៃទី០៩ ខែមីថុនា ឆ្នាំ២០១៧នេះស្ថិតក្រោមអធិបតីភាពឯ.ឧនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិនិងឯ.ឧនាយឧត្តមសេនីយ៍ ប៉ុល សារឿនអគ្គមេបញ្ជាការ នៃខ.ភ.មព្រមទាំងឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ឯកឧត្តម អគ្គមេបញ្ជាការរង អគ្គនាយក អគ្គនាយករងអគ្គនាយកដ្ឋាន នាយក នាយករងនាយកដ្ឋាន និងស្ថាប័នចំណុះក្រសួងការពារជាតិនិងអគ្គបញ្ជាការដ្ឋាននៃខ.ភ.មជាច្រើនរូបទៀត។
ឯ.ឧនាយឧត្តមសេនីយ៍ ណឹម សុវត្តិ អគ្គនាយក អគ្គនាយកដ្ឋាននយោបាយ និងកិច្ចការបរទេសក្រសួងការពារជាតិ បានមានប្រសាសន៍ឲ្យដឹងថាទិវានៃការចងចាំ នៃដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុលពត គឺបានផ្តើមចេញពីដំណើរការរត់ភាសន៍ខ្លួនរបស់សម្តេចតេជោ ហ៊ុនសែន ចេញពីរបបប្រល័យពូជសាសន៍នៅក្នុងភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នាយប់ថ្ងៃទី២០ ខែមីថុនា ឆ្នាំ១៩៧៧ទៅកាន់ព្រំដែនទឹកដីប្រទេសវៀតណាម។ ក្រុមការងារក្រសួងការពារជាតិបានសិក្សាស្រាវជ្រាវនាខែមីនាឆ្នាំ២០១៧កន្លងមកនេះជា៤ដំណាក់កាលនៅក្នុងរយៈពេលជាង៤០ឆ្នាំមុន ទៅលើប្រវត្តិចលនាតស៊ូដ៏អង់អាចក្លាហានរបស់សមមិត្ត ហ៊ុនសែន រួមនិងទាហានខ្មែរក្រហមចំនួន៤រូបទៀតដែលរត់ទៅកាន់ប្រទេសវៀតណាម ហើយបានបង្កើតបានកងវរៈសេនាធំលេខ១២៥ មុនចលនារណសិរ្ស២ធ្នូឆ្នាំ១៩៧៨និងបានចូលរួមវាយរំដោះប្រទេសនិងប្រជាជនកម្ពុជាឲ្យរួចផុតពីរបបប្រល័យពូជសាសន៍ប៉ុលពត នាថ្ងៃ៧មករាឆ្នាំ១៩៧៩ជាប្រវត្តិសាស្ត្រ។
នៅក្នុងពិធីផ្សព្វផ្សាយទិវានេះក្រសួងការពារជាតិក៏ប្រកាសបញ្ចូលក្របខ័ណ្ឌនិងបំពាក់ឋានន្តរសក្តិជូនដល់នាយទាហានថ្នាក់ឧត្តមសេនីយ៍ឯកចំនួន២រូបគឺឧត្តមសេនីយ៍នុត ថន និងឧត្តមសេនីយ៍ វ៉ា ប៉ោអៀន អតីតយុទ្ធមិត្តសមមិត្ត ហ៊ុនសែន និងបំពាក់ឋានន្តរសក្តិថ្នាក់វរៈសេនីយ៍ឯកដល់លោកវរៈសេនីយ៍ សៃ នឿន អតីតនារសាសមមិត្ត ហ៊ុនសែន នាឆ្នាំ១៩៧៧ផងដែរ។ដែលអ្នកទាំងនេះជាសាក្សីរស់នៃប្រវត្តិសាស្ត្រទិវានៃការចងចាំនៃដំណើរឆ្ពោះទៅការផ្តួលរំលំរបបប្រល័យពូជសាសន៍ប៉ុលពត។
ឯ.ឧ នាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានមានប្រសាសន៍ថាទិវានៃការចងចាំនៃដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុលពតគឺជាទិវាប្រវត្តិសាស្ត្រដែលបានកកើតឡើងចលនាតស៊ូដ៏អង់អាចក្លាហានបំផុតនៅក្នុងរយៈពេល៤០ឆ្នាំមុននេះរបស់ព្រះរាជាណាចក្រកម្ពុជា។ទិវានេះ នឹងប្រារព្វពិធីជាផ្លូវការនាថ្ងៃទី២១,២២ ខែមិថុនាឆ្នាំ២០១៧ខាងនេះនៅលើទីតាំងជាក់ស្តែង ស្រុកមេមត់ខេត្តត្បូងឃ្មុំ។ ឯ.ឧឧបនាយករដ្ឋមន្ត្រី ទៀ បាញ់ បានគូសបញ្ជាក់ថា បើគ្មានចលនាថ្ងៃទី២០,២១ ខែមិថុនាឆ្នាំ១៩៧៧ក៏មិនមានចលនារណសិរ្ស២ធ្នូឆ្នាំ១៩៧៨គ្មានថ្ងៃជ័យជំនះ៧មករាឆ្នាំ១៩៧៩គ្មានថ្ងៃសន្តិភាពទីក្រុងប៉ារីស បង្រួបបង្រួមជាតិបោះឆ្នោតឆ្នាំ១៩៩៣គ្មាននយោបាយឈ្នះឈ្នះនិងក៏មិនមានសន្តិភាពនិងការអភិវឌ្ឍន៍ដូចសព្វថ្ងៃនេះផងដែរ។ឯ.ឧឧបនាយករដ្ឋមន្ត្រី បានជំរុញឲ្យក្រុមការងារបន្តស្រាវជ្រាវបំពេញខ្លឹមសារដល់ចលនាថ្ងៃទី២១ខែមិថុនាឆ្នាំ១៩៧៧ហើយធ្វើការផ្សព្វផ្សាយឲ្យទូលំទូលាយនិងរៀនសូត្រពីអត្ថន័យខ្លឹមសារធំសំខាន់ៗ ពីទិវានៃការចងចាំនៃដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុលពតនេះនិងទុជាមេរៀនដល់មនុស្សគ្រប់ជំនាន់គ្រប់ស្ថាប័ននិងគ្រឹះស្ថានអប់រំសិក្សា ដើម្បីស្វែងយល់ឃើញពីការធ្វើពលីកម្មនិងតម្លៃដ៏ធំធេងរបស់ថ្នាក់ដឹកនាំប្រទេសជាតិកម្ពុជា។