ទិវាចងចាំ ៤០ឆ្នាំ (២១មិថុនាឆ្នាំ១៩៧៧-២១មិថុនាឆ្នាំ២០១៧) នៃដំណើរឆ្ពោះទៅការផ្តួលរំលំ របបប្រល័យពូជសាសន៍ ប៉ុល ពត បានប្រារព្វធ្វើឡើងនៅលើទីតាំងប្រវត្តិសាស្រ្តសំខាន់បំផុត ចំនួន៦កន្លែងលើទឹកដីនៃ ព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា រួមទាំងសម្តេច ឯកឧត្តម លោកជំទាវ ជាឥស្សរជនជាន់ខ្ពស់ តំណាងគ្រប់ស្ថាប័នរបស់ព្រះរាជាណាចក្រកម្ពុជា សាធារណរដ្ឋសង្គមនិយមវៀតណាម និងឥស្សរជនការទូតនៃបណ្តាប្រទេស ជាមិត្តនានាប្រចាំព្រះរាជាណាចក្រកម្ពុជា បានអញ្ជើញធ្វើដំណើរទៅកាន់ទីតាំងប្រវត្តិសាស្រ្តទាំង៦កន្លែងនោះ កាលពីថ្ងៃទី២១មិថុនាឆ្នាំ២០១៧។ នៅទីតាំងសាលាបឋមសិក្សា ហ៊ុន សែន កោះថ្ម ស្ថិតក្នុងភូមិសាស្រ្តភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ ដែលជាទីតាំងចំណុចប្រវត្តិសាស្រ្តទី១ នៃដំណើរឆ្ពោះទៅកាន់ការផ្តួលរំលំរបបប្រល័យពូជ សាសន៍ ប៉ុល ពត សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញអុជទៀនធូប បូជាផ្កាភ្ញី ទីកន្លែងសក្ការះទេពបង្ហាញផ្លូវ ការថតរូបអនុស្សាវរីយ៍នៅសិលាចារឹកនៃទីតាំងប្រវត្តិសាស្រ្ត ជាមួយនិងអតីតយុទ្ធជនពីរូបផ្សេងទៀត ក្នុងនោះរួមមាន ឯកឧត្តម នុច ថន ឯកឧត្តម រ៉ា ប៉ោអ៊ាន ដោយឡែកកូនអតីតសពឯកឧត្តម ញឹក ហួន ឯកឧត្តម សាន សាញ់ លោក សៃ នឿន អតីតអ្នកនាំសារដ៏ស្មោះត្រង់ របស់សម្តេចតេជោនាយករដ្ឋមន្រ្តី ក៏មានវត្តមានក្នុងពិធីដ៏កម្រនោះដែរ។ គួរបញ្ជាក់ដែរថា ទីតាំងកោះថ្ម គឺជាអតីតបញ្ជាការដ្ឋានវិរសេនាធំតំបន់២១ ពោលគឺកាលពីវេលាម៉ោង២១យប់ថ្ងៃទី២០ ខែមិថុនាឆ្នាំ១៩៧៧ ចំថ្ងៃច័ន្ទ ៥កើត ខែអា សាឍ ឆ្នាំម្សាញ់ នពស័ក ពុទ្ធសករាជ ២៥២១ សមមិត្ត ហ៊ុន សែន និងកម្មាភិបាលដ៏ទុកចិត្តចំនួន៤នាក់ផ្សេងទៀត រួមមាន នុច ថន ញឹក ហួន សាន សាញ់ និងរ៉ា ប៉ោអ៊ាន បានផ្តើមដំណើរភៀសខ្លួនចូលទៅកាន់ប្រទេសវៀតណាម ដើម្បីស្វែងរកការជួយឧបត្ថម្ភគាំទ្រ ពីភាគីវៀតណាម ក្នុងរំដោះប្រទេសនិងប្រជាជនកម្ពុជា ចេញពីរបបប្រល័យពូជ សាសន៍ ប៉ុល ពត។ បន្ទាប់ការប្រារព្វពិធីតាមបែបសាសនា និងការប្រាស្រ័យទាក់ទងដោយភាពស្និទ្ធស្នាលពីសំណាក់ បងប្អូនប្រជាពលរដ្ឋភូមិកោះថ្ម ដែលជាអ្នកធ្លាប់ជួយលាក់កំបាំង និងការជួយយកអាសាគ្រប់បែបយ៉ាង ចំពោះ សម្តេចក៏ដូចជាកម្មាភិបាលដទៃទៀត និងការស្វាគមន៍ពីសំណាក់អភិបាលនៃគណះអភិបាលខេត្តត្បូងឃ្មុំ ស្តីពីសកម្មភាព សម្តេចតេជោនាយករដ្ឋមន្រ្តី អញ្ជើញចូលរួមក្នុងទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត រួចមក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញ មានប្រសាសន៍សំណេះសំណាលទាក់ទិនទៅនិងប្រវត្តិ និងសកម្មភាព និងការចងចាំនានា ទាក់ទិនទៅនិងដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត ក្នុងខ្លឹមសារទាំងស្រុងដូចតទៅ។ បន្ទាប់មក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញចែកអំណោយជានិម្មិតរូបជូនដល់តំណាងសាលាស្រុកមេមត់ តំណាងការិយាល័យអប់រំស្រុក លោកគ្រូអ្នកគ្រូ សិស្សានុសិស្ស និងតំណាងប្រជាពលរដ្ឋទាំងអស់ ក្នុងភូមិកោះថ្ម ដែលមានវត្តមានក្នុងពិធីសំណេះសំណាលគ្នានោះ។ សម្តេចតេជោនាយករដ្ឋមន្រ្តីបានធ្វើការប្រាស្រ័យទាក់ទង និងភាពស្និទ្ធស្នាលបំផុត ជាមួយប្រជាពលរដ្ឋភូមិកោះថ្ម ដែលជាអ្នកជួយយកអាសាសម្តេចក្នុងរបបប្រល័យពូជសាសន៍ ប៉ុល ពត។ តាមរយះពិធីសំណេះសំណាលគ្នានោះដែរ សម្តេចតេជោនាយករដ្ឋមន្រ្តីបានធ្វើការដោះស្រាយ នូវរាល់សំណើស្នើសុំពីប្រជាពលរដ្ឋទាំងនោះ ដោយសេចក្តីគោរពរាប់អានដ៏ស្មោះស័គ្របំផុត ពិសេសការដោះស្រាយនូវរាល់សមិទ្ធផលមួយចំនួន ដែលទាក់ទិនទៅនិងការអភិវឌ្ឍភូមិ ឃុំ របស់បងប្អូនប្រជាពលរដ្ឋភូមិកោះថ្ម។
បន្ទាប់ពីការសំណេះសំណាលនៅតំបន់ទីតាំងប្រវត្តិសាស្រ្តទី១រួចមក សម្តេចតេជោនាយករដ្ឋមន្រ្តីបានបន្តដំ ណើរតាមរថយន្ត អញ្ជើញធ្វើដំណើរទៅកាន់ទីតាំងឆ្លងព្រំដែនចំណុច X16 ព្រំដែនកម្ពុជា វៀតណាម។ នៅចំណុច X16 ព្រំដែនកម្ពុជា វៀតណាម សម្តេចតេជោនាយករដ្ឋមន្រ្តីបានអញ្ជើញអុជទៀនធូប និងបូជាផ្កាភ្ញី គោរពទេពប្រឹក្សា ដែលស្ថិតនៅក្រោមដើមត្រយឹង។ សូមបញ្ជាក់ដែរថា ទីតាំងដែរសមមិត្ត ហ៊ុន សែន និងក្រុមយុទ្ធជនកម្ពុជា ធ្វើដំណើរឆ្លងកាត់ពីទឹកដីកម្ពុជា ត្រង់ចំណុចត្រពាំងរកា ត្រពាំងខ្ព័រ និងអាងដាច់ ដែលមានដើមទ្រយឹងធំស្កឹមស្កៃនៅក្បែរ នោះ ដើម្បីឆ្លងចូលទៅកាន់ទឹកដីវៀតណាម ស្រុកឡុកនិញ ខេត្តសុងប៊ែរ។ សម្តេចតេជោនាយករដ្ឋមន្រ្តីបានធ្វើការ ពិនិត្យទីតាំងប្រវត្តិសាស្រ្តនោះ ក្នុងភាពរំជើបរំជួលក្នុងអារម្មណ៍ដោយមិននឹកស្មានថានឹងមិនមានថ្ងៃនេះ បើសម្លឹង មើលទៅក្រោយកាលពី៤០ឆ្នាំមុន ពោលគឺមុនពេលដែលឈានជើងចូលក្នុងទឹកដីវៀតណាម សមមិត្ត ហ៊ុន សែន បានបែរមកខាងទឹកដីកម្ពុជាទាំងទឹកភ្នែក ដោយនិយាយក្នុងចិត្តថា អាយុ១៣ឆ្នាំបែកពីស្រុកកំណើតដោយអត់សាលា រៀន អាយុ២៥ឆ្នាំបែកពីប្រទេសកំណើត ដោយពួកឃាតករ។ បន្ទាប់ពីចំណាយពេលប្រមាណ១០នាទី ដើម្បីធ្វើការ ពិនិត្យឡើងវិញដោយផ្ទាល់នៅលើចំណុចទីតាំងដ៏ខ្លោចផ្សារនោះ សម្តេចតេជោនាយករដ្ឋមន្រ្តីបានអញ្ជើញមានប្រសាសន៍ សំណេះសំណាលទៅកាន់អ្នកចូលរួមទាំងអស់ ដែលទាក់ទិនទៅនិងការចងចាំនៃដំណើរឆ្ពោះទៅកាន់ការផ្តួល រំលំរបបប្រល័យពូជសាសន៍ ប៉ុល ពត ពីសេសការធ្វើដំណើរឆ្លងកាត់ព្រំដែន នៃប្រទេសទាំងពីរកម្ពុជា វៀតណាម ក្នុង ដំណើរផ្លូវដ៏គ្រោះថ្នាក់បំផុត ក្នុងខ្លឹមសារទាំងស្រុងដូចតទៅ។ បន្ទាប់មកសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា រួមទាំង យុទ្ធមិត្តចំនួន២រូបទៀត គឺឯកឧត្តម នុច ថន និងឯកឧត្តម រ៉ា ប៉ោអ៊ាន បានអញ្ជើញធ្វើដំណើរដោយថ្មើរជើង ប្រមាណ២០០ម៉ែត្រ ឆ្លងកាត់អាងដាក់ទឹកដីកម្ពុជា ចូលទៅក្នុងទឹកដីវៀតណាម ដែលជាទីតាំងអតីតផ្លូវចាក់ កាលពី៤០ឆ្នាំមុន សម្តេចបានធ្វើដំណើរលើផ្លូវដដែលនោះ។ សូមបញ្ជាក់ដែរថា វេលាម៉ោង២ទៀបភ្លឺថ្ងៃទី២១ ខែមិថុនា ឆ្នាំ១៩៧៧ សមមិត្ត ហ៊ុន សែន បានដើរចូលដោយថ្មើរជើងប្រមាណ២០០ម៉ែត្រ ទៅក្នុងទឹកដីវៀតណាម ក្នុងចម្ងាយផ្លូវនោះ សម្តេចតេជោ និងយុទ្ធមិត្ត៤នាក់ទៀតបានចងអន្រឹងគេងរងចាំពេលភ្លឺ ដើម្បីកំណត់ទិសដៅ សម្រាប់បន្តដំណើរ និង ពុំមានអ្វីទទួលទាននោះឡើយ។ សូមបញ្ជាក់ដែរថា នៅក្នុងដំណើរនៃការឆ្លងកាត់ព្រំដែន នោះ សំណួរមួយចំនួនដែល សមមត្តិ ហ៊ុន សែន បានចោទសួរខ្លួនឯកថា តើអាចត្រូវស្លាប់នៅពេលឆ្លងព្រំដែនកម្ពុជា វៀតណាម ដោយការជាន់មីន ឬដោយកងការពារព្រំដែនវៀតណាមបាញ់ស្លាប់នោះទេ និងតើអាចត្រូវជាប់គុកដោយ សារការឆ្លងដែនដែរឬទេ និងថាតើវៀណាមជឿហើយសុខចិត្តជួយក្នុងការផ្តួលរំលំរបបប្រល័យពូជសាសន៍ ប៉ុល ពត ឬទេ ក្នុងពេលដែលវៀតណាម មានទំនាក់ទំនងការទូតជាមួយកម្ពុជាប្រជាធិបតេយ្យ និងសំណួរចុងក្រោយថាតើ វៀតណាមអាចចាប់ បញ្ជូនមកឲ្យ ប៉ុល ពត វិញឬទេ។ ក្រោយពីធ្វើដំណើរកាត់ព្រៃក្នុងទឹកដីវៀតណាម ប្រមាណជិត៦គីឡូម៉ែត្រ វេលាម៉ោង១១ជិតថ្ងៃត្រង់ ថ្ងៃទី២១មិថុនា ឆ្នាំ១៩៧៧ ក្រុមសមមិត្ត ហ៊ុន សែន បានធ្វើដំណើរមកដល់ផ្លូវក្រួសក្រហម ក្នុងតំបន់នោះសមមិត្ត ហ៊ុន សែន និងមិត្តរួមអាវុធ បានធ្វើការលាក់អាវុធនិងបរិក្ខាសឹកមួយចំនួនទៀត ព្រមទាំងរៀបចំដាំបបរអង្ករដែលនៅសេសសល់ក្នុងដៃបន្តិចបន្តួច រួចបន្តដំណើរតាមផ្លូវថ្នល់ទៅរកជួបកងទ័ព និងប្រជាជនវៀតណាម។ កន្លែងលាក់អាវុធនោះ មានកាំភ្លើង៣ដើម ក្នុងនោះមានកាំភ្លើងអាកា៥៤ អឹម១៦ អាកា៤៧ គ្រាប់បែកពីរគ្រាប់ និងកាំបិទខ្វែវ។ សូមបញ្ចាក់ដែរថា នេះគឺជាគោលដៅទី១ក្នុងប្រទេសវៀតណាម ដែលសម្តេចតេជោបានធ្វើដំណើរចូលមកកាន់ ទឹកដីវៀតណាម។ ទាក់ទិនទៅ នឹងការលាក់ទុកសម្ភារះសឹកទាំងអស់នោះ សម្តេចតេជោនាយករដ្ឋមន្រ្តី អញ្ជើញមានប្រសាសន៍យ៉ាងដូច្នេះថា (ដាក់ សម្លេងដើមសម្តេចតេជោ)។
បន្ទាប់ពីការលាក់ទុកអាវុធនិងសម្ភារះសឹករួចរាល់មក សម្តេចតេជោនាយករដ្ឋមន្រ្តីនិងយុទ្ធមិត្តរួមអាវុធទាំងអស់ បានបន្តដំណើរដោយថ្មើរជើងចូលជ្រៅក្នុងទឹកដីវៀតណាម ពោលគឺចូលជ្រៅប្រមាណ១៤គីឡូម៉ែត្រ មកដល់ភូមិថាញ់តឺ ឃុំឡុកតឹង ស្រុកឡុកនិញ ខេត្តសុងប៊ែរ បច្ចុប្បន្នខេត្តប៊ិញហ្វឿក។ នៅទីនោះពោលគឺម៉ោងប្រមាណ១៤ រសៀលថ្ងៃដដែលនោះ សម្តេចតេជោនិងយុទ្ធមិត្តទាំងអស់ បានជួបប្រទះនិងកម្មករចម្ការកៅស៊ូវៀតណាម និងបាន ជួបប្រជាជនវៀតណាមមួយចំនួន ដែលនៅទីនោះសម្តេចនិងយុទ្ធមិត្តទាំងអស់ ត្រូវបានប្រជាជនវៀតណាមបានរៀបចំដាំបាយជូនសម្តេចនិងយុទ្ធមិត្តទាំងអស់។ ទាក់ទិនទៅនិងប្រវត្តិសាស្រ្តនៅគោលដៅទី២ ក្នុងទឹកដីវៀតណាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញសំណេះសំណាលទៅកាន់សាក្សីពីររូប និងបណ្តាអ្នកយកព័ត៌មានជាតិអន្តរជាតិ ក្នុងខ្លឹមសារយ៉ាងដូច្នេះថា (សម្លេងដើមសម្តេច តេជោ)។
បន្ទាប់មកសម្តេចតេជោនាយករដ្ឋមន្រ្តី និងថ្នាក់ដឹកនាំទាំងអស់ បានអញ្ជើញបន្តដំណើរទៅកាន់គោលដៅទី៣ ក្នុងទឹកដីវៀតណាម ពោលគឺការធ្វើដំណើរចាកចេញពីភូមិថាញ់តឺ ឆ្ពោះទៅកាន់ស្នាក់ការយោធាឃុំឡុកតឺនចាស់។ សូមបញ្ជាក់ដែរថា នៅក្នុងគោលដៅទី៣ ក្នុងទឹកដីវៀតណាម សម្តេចតេជោនាយករដ្ឋមន្រ្តី និងថ្នាក់ដឹកនាំខេត្ត ប៊ិញ ហ្វឿក បានអញ្ជើញចូលរួមក្នុងពិធីកាត់ខ្សែបូរសម្ពោធបើកឲ្យប្រើប្រាស់ជាផ្លូវ នូវសារមន្ទីរអនុស្សាវរីយ៍ ទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត ការបើករបាំងស្បៃសិលាចារឹក និងបានដាំកូនឈើទុកជា អនុស្សាវរីយ៍ ជាមួយមន្រ្តីវៀតណាមជាច្រើនរូប។ នៅក្នុងពិធីនោះក៏មានការអញ្ជើញចូលរួមពីឯកឧត្តម លោកជំទាវ ជាឥស្សរជនជាន់ខ្ពស់ និងប្រជាជនខេត្តប៊ិញហ្វឿក ជាច្រើនរូប។ នៅក្នុងពិធីដ៏មានអត្ថន័យជាប្រ វត្តិសាស្រ្តនោះដែរ សម្តេចតេជោនាយករដ្ឋមន្រ្តីបានអញ្ជើញចូលរួម ក្នុងពិធីសំណេះសំណាលជាមួយថ្នាក់ដឹកនាំ និងប្រជាពលរដ្ឋវៀតណាម ខេត្តប៊ិញហ្វឿក ដែលមានវត្តមានក្នុងពិធីសំណេះសំណាលគ្នានោះ។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា អញ្ជើញមានប្រសាសន៍ក្នុងខ្លឹមសារយ៉ាងដូច្នេះថា (សម្លេងដើម សម្តេចច)។
នៅក្នុងពិធីនោះដែរ ឯកឧត្តមអភិបាលនៃគណះអភិបាលខេត្តប៊ិញហ្វឿក មានប្រសាសន៍ក្នុងនាមថ្នាក់ដឹកនាំ និងប្រជាជនវៀតណាមខេត្តប៊ិញហ្វឿក បានថ្លែងនូវអំណរគុណយ៉ាងជ្រាលជ្រៅបំផុត ជូនចំពោះសម្តេចតេជោនាយករដ្ឋមន្រ្តី ដែលបានស្ថាបនានូវសារមន្ទីរអនុស្សាវរីយ៍ដ៏មានអត្ថន័យជាប្រវត្តិសាស្រ្តនោះ ជូនចំពោះថ្នាក់ដឹកនាំ និងប្រជាជនខេត្តប៊ិញហ្វឿក។ ឯកឧត្តមអភិបាលនៃគណះអភិបាលខេត្ត បានគូសបញ្ជាក់ជូនសម្តេចតេជោនាយករដ្ឋមន្រ្តីដែរថា ឯកឧត្តមក៏ដូចជាថ្នាក់ដឹកនាំនិងប្រជាជនខេត្តប៊ិញហ្វឿក និងខិតខំថែរក្សានូវសារមន្ទីរប្រវត្តិសាស្រ្តនេះ ឲ្យបានគង់វង់យូរអង្វែងសម្រាប់ជាឧត្តមប្រយោជន៍របស់ប្រជាជនខេត្តប៊ិញហ្វឿក ក៏ដូចជាភ្ញៀវទេសចរណ៍ជាតិ អន្តរ ជាតិនានា ដែលមកកំសាន្តក្នុងប្រទេសវៀតណាម។ នៅក្នុងពិធីដ៏មានអត្ថន័យនោះដែរ ឯកឧត្តមអភិបាលនៃគណះអភិបាលខេត្តប៊ិញហ្វឿក ក៏បានជូននូវវត្ថុអនុស្សាវរីយ៍មួយចំនួន ជូនសម្តេចតេជោនាយករដ្ឋមន្រ្តី។
បន្ទាប់ពីសម្រាប់ទទួលទានអាហារថ្ងៃត្រង់រួចមក សម្តេចតេជោនាយករដ្ឋមន្រ្តីនិងយុទ្ធមិត្តពីររូបផ្សេងទៀត គឺ ឯកឧត្តម នុជ ថន និងឯកឧត្តម វ៉ា ប៉ោអ៊ាន រួមទាំងកូនរបស់ឯកឧត្តម ញឹកហួន និងឯកឧត្តម សាន សាញ់ បាន អញ្ជើញឡើងរថយន្តសេម៉ាសេ ដែលជាអតីតរថយន្តចាស់ធ្លាប់ដឹកសមមិត្ត ហ៊ុន សែន និងយុទ្ធមិត្តទាំង៤រូបផ្សេងទៀត ធ្វើដំណើរចាកចេញពីសារមន្ទីរ នៃទិវាចងចាំដំណើរឆ្ពោះទៅការផ្តួលរំលំរបប ប៉ុល ពត ក្នុងឃុំឡុកថាញ់ ស្រុក ឡុកនិញ ឆ្ពោះទៅកាន់បញ្ជាការដ្ឋានយោធាស្រុកឡុកនិញ អមដោយគណះប្រតិភូជាច្រើនរូបទៀត។ សូមបញ្ជាក់ដែរ ថា សម្តេចតេជោនាយករដ្ឋមន្រ្តី និងយុទ្ធមិត្តរួមអាវុធទាំងអស់ បានធ្វើដំណើរតាមរថយន្ត សេអឹមសេ នោះក្នុងដំណើរ ផ្លូវប្រមាណ២០នាទី បានមកដល់បញ្ជាការដ្ឋានយោធាស្រុកឡុកនិញ ដែលជាទីតាំងប្រវត្តិសាស្រ្ត នៃការចងចាំបំផុតទី៦ របស់សម្តេចតេជោនាយករដ្ឋមន្រ្តី។ សូមបញ្ជាក់ដែរថា នៅក្នុងរថយន្តនោះមានការដឹកអុសជាច្រើនផងដែរ។ នៅទីនោះសម្តេចតេជោនាយករដ្ឋមន្រ្តី បានអញ្ជើញមានប្រសាសន៍ក្នុងខ្លឹមសារយ៉ាងដូច្នេះថា (សម្លេងដើមសម្តេចតេជោ)។
បន្ទាប់មកសម្តេចតេជោនាយករដ្ឋមន្រ្តី និងគណះប្រតិភូអមដំណើរទាំងអស់ បានអញ្ជើញបន្តដំណើរចាកចេញពី បញ្ជាការដ្ឋានយោធាស្រុកឡុកនិញ ខេត្តប៊ិញហ្វឿក ក្នុងដំណើរឆ្ពោះទៅកាន់ទីក្រុងធូយ៉ូវម៉ូត ខេត្តប៊ិញយឿង ដែលនៅទីនោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ត្រូវបាន ការធ្វើគារវកិច្ចស្វាគមន៍យ៉ាងស្និទ្ធស្នាល និងរ៉ាក់ទាក់បំផុត ពីសំណាក់សមភាគីវៀតណាម ឯកឧត្តម ង្វៀន សួនហ៊្វុក នាយករដ្ឋមន្រ្តីវៀតណាម និងឥស្សរជនជាន់ខ្ពស់វៀតណាមជាច្រើនរូប។ នៅក្នុងពិធីស្វាគមន៍ដែលធ្វើឡើងនៅមជ្ឈមណ្ឌលសន្និបាតខេត្តប៊ិញយឿង សម្តេចតេជោនាយករដ្ឋមន្រ្តី និងសមភាគីវៀតណាម ឯកឧត្តម ង្វៀន សួនហ៊្វុក បានធ្វើការសំណេះសំណាលយ៉ាងរ៉ាក់ទាក់បំផុត ចំពោះដំណើរនៃការអញ្ជើញបំពេញទស្សនកិច្ចការងារ និងការប្រារព្វទិវាចងចាំរបស់ សម្តេច ហ៊ុន សែន ដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត។ ជាមួយគ្នា នោះដែរ សម្តេចតេជោនាយករដ្ឋមន្រ្តីក៏បានជួបសន្ទនាដាច់ដោយឡែកជាមួយ លោកវិរសេនីយ៍ទោ ង្វៀន ថាញ់ប៊ិញ អតីតមេបញ្ជាការរង និងជាមេបញ្ជាការសមរភូមិមុខ យោធាខេត្តសុងប៊ែរ ដែលជាសាក្សីដឹងឮដ៏សំខាន់ម្នាក់ អំពីស្ថានភាព និងសភាពការណ៍ផ្ទាល់របស់សម្តេចតេជោនាយករដ្ឋមន្រ្តី នាឆ្នាំ១៩៧៧។ នៅក្នុងពិធីសំណេះសំណាលនោះដែរ ថ្នាក់ដឹកនាំវៀតណាមទាំងអស់ បានសំដែងនូវការវាយតម្លៃខ្ពស់ និងកោតសរសើរចំពោះគំរូវរភាពដ៏អង់អាចក្លាហាន របស់សម្តេចដែលបានបូជានូវកម្លាំងកាយចិត្ត ប្រជ្ញាស្មារតី និងការលះបង់សាច់ស្រស់ ឈាមស្រស់ ក្នុងបុព្វហេតុរំដោះប្រទេស និងប្រជាជនកម្ពុជា។ ការសង្រោ្គះអាយុជីវិតប្រជាជនចេញពីគ្រោះអត់ឃ្លាន ការបញ្ចប់សង្រ្គាម ដំណើរការស្វែងរកសុខសន្តិភាព ផ្សះផ្សារបង្រួបបង្រួមជាតិ ការដឹកនាំប្រទេសជាតិមានកំណើនសេដ្ឋកិច្ចខ្ពស់ និងការអភិវឌ្ឍប្រទេសកម្ពុជាមានភាពរីកចម្រើនយ៉ាងឆាប់រហ័សពីមួយថ្ងៃទៅមួយថ្ងៃ។
បន្ទាប់មកសម្តេច ហ៊ុន សែន ដែលអមដំណើរដោយផ្ទាល់ ពីសមភាគីវៀតណាម ឯកឧត្តម ង្វៀន សួនហ៊្វុក នាយករដ្ឋមន្រ្តីវៀតណាម បានអញ្ជើញជាអធិបតី ក្នុងពិធីសំណេះសំណាលជាមួយថ្នាក់ដឹកនាំ អតីតយុទ្ធជន និងនិស្សិតកម្ពុជា វៀតណាម ប្រមាណ៨០០នាក់។ ឯកឧត្តម ង្វៀន សួនហ៊្វុក នាយករដ្ឋមន្រ្តីវៀតណាម មានប្រសាសន៍ថា វត្តមានរបស់សម្តេចតេជោ នៅលើទឹកដីវៀតណាមនៅពេលនេះ មិនគ្រាន់តែជាការរំលឹកអំពីការចងចាំរបស់សម្តេច ចំពោះទិវាចងចាំនៃដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត ប៉ុណ្ណោះទេ ប៉ុន្តែវាបានកើតឡើង ព្រមគ្នាទៅនិងការប្រារព្វខួប៥០ឆ្នាំ នៃការបង្កើតចំណងការទូតនៃប្រទេសទាំងពីរកម្ពុជា-វៀតណាម ១៩៦៧-២០១៧។ ឯកឧត្តមនាយករដ្ឋមន្រ្តីវៀតណាម មានប្រសាសន៍បន្តថា វត្តមានរបស់សម្តេចតេជោនៅពេលនេះ ក៏បាន បង្ហាញឲ្យឃើញពីការគោរពស្រឡាញ់ដឹងគុណ និងក្នុងនាមជាអ្នកជិតខាងល្អ ដែលជាផ្លៃផ្កានៃកិច្ចសហប្រតិបត្តិការ គ្រប់ជ្រុងជ្រោយ ស្ថិតស្ថេរយូរអង្វែងរវាងប្រទេសទាំងពីរកម្ពុជា វៀតណាម។ ឯកឧត្តមបន្តថា ប្រជាជនវៀតណាម មានពាក្យមួយឃ្លាដែលបាននិយាយថា នៅពេលដែលមានភាពផ្អែមល្ហែមហើយ ត្រូវនឹកដល់ភាពជួរចត់ផង តាមរយះពាក្យពេជដ៏មានអត្ថន័យនោះដែរ យើងទាំងអស់គ្នាបានគិតយ៉ាងច្បាស់លាស់ ពីប្រវត្តិនៃចំណងសាមគ្គីភាព ការកៀក ស្មាគ្នា រវាងប្រទេសនិងប្រជាជនទាំងពីរវៀតណាម កម្ពុជា ទាំងក្នុងគ្រាលំបាកផង ទាំងក្នុងពេលដែលមានសន្តិភាព និងទាំងក្នុងភាពសំបូរសប្បាយ សុភមង្គលផង។ ឯកឧត្តមនាយករដ្ឋមន្រ្តីមានប្រសាសន៍សង្កត់ផងដែរ ពីកិច្ចសហប្រតិបត្តិការនៃប្រទេសទាំងបីនៅឥណ្ឌូចិន កម្ពុជា ឡាវ វៀតណាម ក្នុងការសាមគ្គីគ្នាប្រយុទ្ធប្រឆាំង និងការឈ្លានពានពី សត្រូវឈ្លានពានកាលពីអតីតកាល រហូតទទួលបាននូវឯករាជ្យទាំងស្រុងនៅឆ្នាំ១៩៧៥ដូចគ្នា។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា ថ្លែងនូវអំណរគុណយ៉ាងជ្រាលជ្រៅបំផុត ជូនចំពោះឯកឧត្តម ង្វៀន សួនហ៊្វុក នាយករដ្ឋមន្រ្តីវៀតណាម ដែលបានចំណាយពេលវេលាដ៏មានតម្លៃបំផុត អញ្ជើញធ្វើដំណើរមកកាន់ខេត្តប៊ិញយឿង ក្នុងការទទួលស្វាគមន៍ចំពោះវត្តមាន របស់សម្តេច និងគណះប្រតិភូជាន់ខ្ពស់កម្ពុជា។ សម្តេចតេជោនាយករដ្ឋមន្រ្តីបន្តថា ពេញមួយថ្ងៃនេះសម្តេចបានធ្វើដំណើរឆ្លងកាត់តំបន់ចងចាំនានា ដែលទាក់ទិនទៅនិងដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត។ សម្តេចបន្តថា ថ្ងៃនេះគឺជាថ្ងៃដែលមានការឈឺចាប់បំផុតរបស់សម្តេច ដែលរយះពេល៤០ឆ្នាំមុន សម្តេចបានធ្វើដំណើរចាកចេញពីប្រទេសកម្ពុជា ដើម្បីធ្វើការភៀសខ្លួនមកកាន់ប្រទេសវៀតណាម ស្វែងរកការជួយឧបត្ថម្ភរបស់វៀតណាម ដើម្បីឈានទៅវាយរំលំរបបប្រល័យពូជសាសន៍ ដើម្បីរំដោះនិងសង្រោ្គះប្រទេសនិងប្រជាជនកម្ពុជាចេញពីរបបមួយដែលមិនធ្លាប់មានទាល់តែសោះ លើពិភពលោក។ សម្តេចតេជោបន្តថា ដំណើរទស្សនកិច្ចការងាររបស់ សម្តេចទៅកាន់ប្រទេសវៀតណាមនៅពេលនេះ គឺជាដំណើរប្រវត្តិសាស្រ្តនិងក៏មិនមែនជារឿងដាច់ដោយឡែករបស់ សម្តេចនោះទេ ប៉ុន្តែគឺជារឿងប្រវត្តិសាស្រ្តរបស់ប្រទេសនិងប្រជាជនកម្ពុជា ដូចអ្វីដែលរូបសម្តេចធ្លាប់បានមានប្រសាសន៍ជំរាបជូនប្រជាជនកម្ពុជាកាលពីពេលកន្លងមក។ សម្តេចតេជោនាយករដ្ឋមន្រ្តីមានប្រសាសន៍ឯកភាពទៅនឹងប្រសាសន៍លើកឡើងរបស់ ឯកឧត្តម ង្វៀន សួនហ៊្វុក នាយករដ្ឋមន្រ្តីវៀតណាម ពីប្រវត្តិនៃការកៀកស្មាគ្នាប្រយុទ្ធប្រ ឆាំងអាណានិគមនិយមបារាំង និងចក្រពទអាមេរិក រហូតទទួលបាននូវឯករាជ្យយ៉ាងពេញលេញជូនប្រទេសនិមួយៗ ដូចគ្នា។ សម្តេចតេជោ មានប្រសាសន៍បញ្ជាក់បន្ថែមថា ការជ្រើសរើសយកផ្លូវមួយចូលទៅកាន់ប្រទេស វៀតណាម គឺមិនមែនជារឿងថ្មីថ្មោងនោះទេ ពោលគឺវាមានប្រវត្តិទាក់ទិនខ្លាំងណាស់ទៅនិងបណ្តាមេដឹកនាំពិភពលោកមួយចំនួន កាលដែលពីសង្រ្គាមលោកលើកទី២ គឺឧត្តមសេនីយ៍ ឌឺហ្គោល បានភៀសខ្លួនទៅប្រទេសអង់គ្លេស ក្នុងបន្តដំណើរដឹកនាំតស៊ូរយះពេល៤ឆ្នាំ រហូតរំដោះប្រទេសបារាំងចេញពីរបបហ្វាស៊ីលក្នុងឆ្នាំ១៩៤៤។ សម្តេចតេជោបន្តថា ដូចគ្នានឹងប្រទេសវៀតណាម លោកប្រធានហូជីមិញ ក៏បានភៀសខ្លួនទៅប្រទេសជាច្រើន ក្នុងការរំដោះ ប្រទេស ហើយនៅថ្ងៃទី២១មិថុនានេះ សម្តេចបានរកឃើញឯកសារប្រវត្តិសាស្រ្តមួយ ពោលគឺកាលពីថ្ងៃទី២១មិថុនា ឆ្នាំ១៩២៥ នៅខេត្តក្វាងទុងប្រទេសចិន លោកប្រធានហូជីមិញ បានបង្កើតកាសែតយុវជនវៀតណាម ហើយនៅថ្ងៃទី២១មិថុនាឆ្នាំ២០១៧ គឺជាខួបលើកទី៩២ នៃចលនារំដោះប្រទេសហើយនោះមិនមែនតែរូបសម្តេចនោះទេ សូម្បីតែមេដឹកនាំនានាបានរកវិធីចាកចេញពីប្រទេសទៅកាន់ការរំដោះនិងសង្រោ្គះជាតិផងដែរ។ សម្តេចតេជោមានប្រសាសន៍សង្កត់ធ្ងន់ថា ប្រសើនបើដំណើររបស់សម្តេចទៅស្វែងរកការគាំទ្រពីវៀតណាម ថាក្បត់ជាតិ គឺយើងត្រូវតែទទួល ស្គាល់ផងដែរចំពោះឧត្តមសេនីយ៍ ឌឺហ្គោល ដែលជាវិរជនរបស់ប្រទេសបារាំង ថាក្បត់ជាតិដែរឬទេ។ សម្តេចតេជោបន្តថា ជីវិតរបស់សម្តេចគឺជាឆាកជីវិតមួយដែលពោរពេញទៅដោយការលំបាកខ្លាំង បើប្រៀបធៀបទៅនិងបណ្តាមេ ដឹកនាំបរទេសជាច្រើនទៀតនោះ។ តាមរយះនេះសម្តេចសូមអរគុណយ៉ាងជ្រាលជ្រៅបំផុត ជូនចំពោះថ្នាក់ដឹកនាំ និងប្រជាជនវៀតណាមដែលតែងតែជួយដល់រូបសម្តេច រហូតជួយវាយផ្តួលរំលំរបបប្រល័យពូជសាសន៍ ប៉ុល ពត រហូតទទួលបាននូវសុខសន្តិភាព និងការអភិវឌ្ឍរីកចម្រើនក្នុងដំណាក់កាលបច្ចុប្បន្ន។ សម្តេចតេជោនាយករដ្ឋមន្រ្តីក៏ បានថ្លែងពីប្រវត្តិមួយចំនួន ជូនដល់ថ្នាក់ដឹកនាំ ក៏ដូចជានិស្សិតកម្ពុជា វៀតណាម ដែលមានវត្តមានក្នុងពិធីសំណេះសំណាលគ្នានោះ ដែលទាក់ទិនទៅនិងភាពឈឺចាប់រាប់មិនអស់ កាលពី៤០ឆ្នាំ នៃការចងចាំរបស់សម្តេចទាក់ទិនទៅ និងទិវានៃការចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត។
បន្ទាប់មកសម្តេចតេជោនាយករដ្ឋមន្រ្តី ក៏បានអញ្ជើញជាអធិបតីដ៏ខ្ពង់ខ្ពស់ ក្នុងពិធីសំណេះសំណាលដាច់ ដោយឡែកជាមួយនិងក្មួយៗនិស្សិតចំនួន៩៥រូប តំណាងឲ្យនិស្សិតចំនួន១០៣រូប ដែលកំពុងសិក្សាក្នុងខេត្តប៊ិនយឿង ប្រទេសវៀតណាម។ នៅក្នុងពិធីសំណេះសំណាលគ្នានោះ សម្តេចតេជោនាយករដ្ឋមន្រ្តីមានប្រសាសន៍ថា និស្សិតកម្ពុជាដែលចេញទៅបន្តការសិក្សានៅក្រៅប្រទេស ក្នុងនោះមានប្រទេសចំនួនពីរគឺប្រទេសវៀតណាម និង ប្រទេសរុស្សី ដែលមានសមត្ថភាពខ្ពស់ក្នុងការបំពេញការងារ ក្នុងរដ្ឋាភិបាលដែលសម្តេចបាននិងកំពុងដឹកនាំប្រទេស។ សម្តេចតេជោ មានប្រសាសន៍សង្កត់ធ្ងន់ថា និស្សិតបញ្ញាវ័ន្តដែលសិក្សាក្នុងប្រទេសទាំងពីរនោះ មាន មូលដ្ឋានទ្រឹស្តី និងការអនុវត្តប្រកបដោយបញ្ញាញាណ និងការគិតគួរខ្ពស់ណាស់ បើប្រៀបធៀបទៅកាន់ប្រទេសសេរី មួយចំនួន។ សម្តេចតេជោ បន្តថា បច្ចុប្បន្នយើងមាននិស្សិតដែលបានសិក្សានៅក្នុងប្រទេសចិន ក៏មាន សមត្ថភាពខ្ពស់ផងដែរ ក្នុងការដឹកនាំការងារ។ សម្តេចក៏បានលើកទឹកចិត្តជូនដល់និស្សិតទាំងអស់ ត្រូវសិក្សាឲ្យបាននូវភាសារមួយថែមទៀត ក្រៅពីភាសាររបស់ប្រទេសដែលយើងមកសិក្សា ក្នុងនោះរួមទាំងភាសាអង់គ្លេស និងភាសាចិនផងដែរ។ ជាមួយនិងការថ្លែងនោះដែរ សម្តេចតេជោក៏បានលើកឡើងដែរថា បើទោះបីជាយើងរៀននៅទីណាក៏ដោយ បញ្ហាសំខាន់គឺយើងយកនូវចំណេះដឹងដែលយើងបានសិក្សាហើយនោះ មក អនុវត្តនិងដឹកនាំឲ្យចំទិសដៅ និងសមត្ថភាពជំនាញរបស់ខ្លួន ជៀសវាងការប្រព្រឹត្តិនូវអំពើជ្រុលនិយមហួសហេតុ។ ជាមួយនិងការថ្លែងនោះដែរ ក៏បានជំរុញនិងលោកទឹកចិត្តដល់និស្សិតកម្ពុជាទាំងអស់ ត្រូវចូលរួមបង្កើតឲ្យមានការតភ្ជាប់រវាងយុវជននិងយុវជន ប្រជាជននិងប្រជាជន ពោកគឺយើងមិនអាចធ្វើជាសត្រូវជាមួយនិងប្រទេសជិតខាងនោះទេ។ សម្តេចសង្កត់ធ្ងន់ថា ប្រទេសដែលមានការរីកចម្រើនគឺអាស្រ័យលើកត្តាសំខាន់ៗចំនួនពីរ គឺទី១កត្តាស្ថេរភាពផ្ទៃក្នុងខ្លួនឯង និងទី២កត្តាទំនាក់ទំនងក្នុងភាពជាអ្នកជិតខាងល្អ ជាមួយនិងប្រទេសជិតខាង។ សម្តេចតេជោក៏បានជិតទុក និស្សិតទាំងអស់នោះ គឺជាផ្នែកមួយដ៏មានសារសំខាន់ក្នុងការធ្វើទំនាក់ទំនងល្អ ជាមួយប្រទេសជិតខាង ក្នុងការអភិវឌ្ឍប្រទេសនិងតំបន់របស់យើង ឲ្យកាន់តែមានភាពរីកចម្រើនទ្វេឡើងថែមទៀត។
