សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងឯ.ឧ ឧត្តមសេនីយ៍ឯក Zhou Songhe មេបញ្ជាការរង កងទ័ពជើងគោក នៃកងទ័ពរំដោះប្រជាជនចិន
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអនុញ្ញាតិឲ្យគណៈប្រតិភូលំហាត់នាគមាស២០១៨ ដឹកនាំដោយ ឯ.ឧ ឧត្តមសេនីយ៍ឯក Zhou Songhe មេបញ្ជាការរង កងទ័ពជើងគោក នៃកងទ័ពរំដោះប្រជាជនចិន ចូលជួបសម្តែងការគួរសម នារសៀលថ្ងៃទី២៨ ខែមីនា ឆ្នាំ២០១៨ម្សិលមិញនេះ។ សម្តេចពិជ័យសេនា ទៀ បាញ់ បានស្វាគមន៍ចំពោះគណៈប្រតិភូ កងទ័ពជើងគោក នៃកងទ័ពរំដោះប្រជាជនចិន ដោយបានចាត់ទុកថា នេះជាការលើកទឹកចិត្តដល់កងទ័ពរំដោះប្រជាជនចិន និងខ.ភ.ម ដែលបាន និងកំពុងធ្វើការហ្វឹកហ្វឺនលំហាត់នាគមាសរួមគ្នា និងកាន់តែពង្រឹងនូវកិច្ចសហប្រតិបត្តិការដ៏រឹងមាំថែមទៀត រវាងកងទ័ពប្រជាជននៃប្រទេសទាំងពីរកម្ពុជានិងចិន។
សម្តេចពិជ័យសេនា ទៀ បាញ់ ជួបជាមួយប្រតិភូចិន
ឯ.ឧ ឧត្តមសេនីយ៍ឯក Zhou Songhe បានថ្លែងកោតសរសើរចំពោះការវិវត្តន៍រីកចម្រើនរបស់ប្រទេសកម្ពុជា និងរាជធានីភ្នំពេញនាបច្ចុប្បន្ន។ ឯ.ឧ បានបន្តថា មិត្តភាពប្រទេស និងប្រជាជនចិនកម្ពុជា មានតាំងពីយូរលុងណាស់មកហើយ។ ក្នុងរយៈពេលរាប់សិបឆ្នាំមកនេះ បានជួយគ្នាទៅវិញទៅមកក្នុងចិត្តមួយថ្លើមមួយ និងធ្វើប្រទេសជាតិរឹងមាំទៀតផង ហើយមានទំនុកទុកចិត្តគ្នាយ៉ាងខ្លាំងក្លា លើវិស័យនយោបាយ សេដ្ឋកិច្ច និងកិច្ចសហប្រតិបត្តិការយ៉ាងជិតស្និតទាំងក្នុងតំបន់ និងលើសកលលោក ជាពិសេសក្នុងបញ្ហាសមុទ្រចិនខាងត្បូង ប្រទេសកម្ពុជា ជាប្រទេសមួយដែលប្រកាន់ជំហរអព្យាក្រិត្យ និងគាំទ្រចំពោះនយោបាយចិន។ តាមរយៈកិច្ចទំនាក់ទំនងរវាងថ្នាក់ដឹកនាំប្រទេសទាំងពីរកម្ពុជាចិន បានជំរុញកិច្ចសហប្រតិបត្តិការឈានដល់គ្រប់ជ្រុងជ្រោយ។ កងទ័ពទាំងពីរ ក៏មានកិច្ចសហប្រតិបត្តិការយ៉ាងជិតស្និត លើច្រើនវិស័យ ក្នុងនោះផ្លាស់ប្តូរគណៈប្រតិភូ ការបណ្តុះបណ្តាធនធានមនុស្ស លំហាត់រួមគ្នា និងការប្រឆាំងភេរវកម្ម រក្សាសន្តិភាព បានក្លាយជាមិត្តភាពដ៏រឹងមាំ។ ឆ្នាំនេះជាខួបលើកទី៥០ នៃថ្ងៃបង្កើតទំនាក់ទំនងការទូតប្រទេសទាំងពីរចិនកម្ពុជា ដែលភាគីទាំងពីររៀបចំឡើងនូវសកម្មភាពជាច្រើនដើម្បីអបអរសាទរ។ សង្ឃឹមថា សកម្មភាពទាំងនេះនឹងពង្រឹងកិច្ចសហប្រតិបត្តិការ និងរឹតចំណងមិត្តភាពឲ្យកាន់តែរឹងមាំថែមទៀត ដើម្បីបំរើផលប្រយោជន៍ប្រជាជនទាំងពីរ និងពង្រឹងសន្តិភាព និងភាពរុងរឿងក្នុងតំបន់។
សម្តេចពិជ័យសេនា ទៀ បាញ់ បានថ្លែងនូវអំណរគុណចំពោះក្រសួងការពារជាតិ និងកងទ័ពរំដោះប្រជាជនចិន ដែលបានជួយកសាងវិទ្យាស្ថានកងទ័ពជើងគោកកម្ពុជា និងការរៀបចំលំហាត់នាគមាសឆ្នាំ២០១៨នៅកម្ពុជានាពេលនេះ ដែលជាការបង្ហាញឲ្យឃើញពីកិច្ចសហប្រតិបត្តិការដ៏ល្អ ក្នុងការលើកម្ពស់ពង្រឹងសមត្ថភាពដល់ជួរកងទ័ពនៃ ខ.ភ.ម ក្នុងកិច្ចការពារជាតិមាតុភូមិ ការពារប្រជាជន និងសុខសន្តិភាពប្រទេសជាតិ ព្រមទាំងនៅក្នុងតំបន់ និងពិភពលោក ៕
