ឯកឧត្តម មាស សុភា អញ្ជើញជួបសំណេះសំណាលជាមួយកងកម្លាំង CMAC នៅស្រុកម៉ាឡៃ
ឯកឧត្តម នាយឧត្តមសេនីយ៍ មាស សុភា ទេសរដ្ឋមន្ត្រីទទួលបន្ទុកបេសកម្មពិសេស លើកិច្ចការមីន គ្រាប់មិនទាន់ផ្ទុះ និងការងារវិស្វកម្មកងយោធពលខេមរភូមិន្ទ អមដំណើរដោយ ឯកឧត្តម ហេង រតនា អគ្គនាយកមជ្ឈមណ្ឌលកំចាត់មីនកម្ពុជា CMAC រួមនឹងមន្ត្រីជំនាញដោះមីន និងនាយទាហានជាន់ខ្ពស់ក្នុងខ.ភ.ម ជាច្រើនរូបបានអញ្ជើញចុះសួរសុខទុក្ខ សំណេះសំណាល និងពិនិត្យមើលសកម្មភាពបោសសំអាតមីន របស់កងកម្លាំងប្រតិបត្តិការបោសសំអាតមីនទី១ CMAC ដែលកំពុងធ្វើសកម្មភាពបោសសំអាតមីន យុទ្ធភ័ណ្ឌមិនទាន់ផ្ទុះ ក្នុងភូមិសាស្ត្រ ភូមិខ្លាងាប់ ឃុំពង្រ ស្រុកម៉ាឡៃ ខេត្តបន្ទាយមានជ័យ កាលពីព្រឹកថ្ងៃទី១១ ខែមករា ឆ្នាំ២០១៩។ 
លោក សំ វីរ: ប្រធានកងឯកភាពបោសសំអាតមីនទី១ របស់មជ្ឈមណ្ឌលកំចាត់មីនកម្ពុជា CMAC ប្រចាំខេត្តបន្ទាយជ័យ
តាមការឲ្យដឹងពីលោក សំ វីរ: ប្រធានកងឯកភាពបោសសំអាតមីនទី១ របស់មជ្ឈមណ្ឌលកំចាត់មីនកម្ពុជា CMAC ប្រចាំខេត្តបន្ទាយជ័យ បានរាយការណ៍ថា៖ កងកម្លាំងបោសសំអាតមីនទី១ CMAC បាននឹងកំពុងប្រតិបត្តិការរុករកគ្រាប់មីន និងយុទ្ធភ័ណ្ឌមិនទាន់ផ្ទុះ នៅក្នុងភូមិសាស្ត្រខេត្តបន្ទាយមានជ័យ។ នៅទូរទាំងខេត្តបន្ទាយជ័យ មានចំការមីនសរុប៣៩២២កន្លែង មានផ្ទៃដី២៥២៤២ហិចតា, ចំការមីនដែលបោសសំអាតរួចសរុប២៣៣៥កន្លែង, ស្មើរនឹងផ្ទៃដី១១៦៧៨ហិចតា, យើងនៅសល់ចំការមីនចំនួន១៥៨៧កន្លែងស្មើរនឹងផ្ទៃដីទំហំ១៣៥៦៤ហិចតាទៀត ដែលត្រូវបន្តបោសសំអាត និងរុករកគ្រាប់មីន និងយុទ្ធភ័ណ្ឌមិនទាន់ផ្ទុះដែលភាគច្រើនសំបូរមានច្រើនក្នុងភូមិសាស្ត្រតំបន់ព្រំដែន ដែលរួមមានក្នុងស្រុកម៉ាឡៃ, ស្រុកអូជ្រៅ, ក្រុងប៉ោយប៉ែត, ស្រុកស្វាយចេក, ថ្មពួក, ភ្នំស្រុក, ព្រះនេតព្រះ, និងស្រុកបន្ទាយអំពិល។ ដោយឡែកនៅក្នុងភូមិសាស្ត្រស្រុកម៉ាឡៃ ខេត្តបន្ទាយមានជ័យ នៅមានសភាពស្មុគស្មាញជាងគេ ដោយសារតំបន់នេះសំបូរព្រៃឬស្សី។ លោក សំ វីរះ ក៍បានបញ្ជាក់ដែរថា៖ ដោយសារក្នុងភូមិសាស្ត្រខេត្តបន្ទាយមានជ័យ កាលពីអតីតកាលក្នុងសម័យសង្គ្រាម ត្រីភាគី តំបន់នេះជាតំបន់សមរភូមិក្តៅ នៃជម្លោះប្រដាប់អាវុធរវាងខ្មែរ និងខ្មែរ បានធ្វើឲ្យតំបន់នេះមានគ្រាប់មីនប្រឆាំងមនុស្ស និងប្រឆាំងរថក្រោះ រួមនឹងយុទ្ធភ័ណ្ឌមិនទាន់ផ្ទុះនៅកប់រាយប៉ាយក្នុងដី ដែលជាប្រការបង្កហានិភ័យដល់ប្រជាជនយើង។ 
ឯកឧត្តម នាយឧត្តមសេនីយ៍ មាស សុភា ទេសរដ្ឋមន្ត្រីទទួលបន្ទុកបេសកម្មពិសេស លើកិច្ចការមីន គ្រាប់មិនទាន់ផ្ទុះ និងការងារវិស្វកម្មកងយោធពលខេមរភូមិន្ទ
ក្នុងឱកាសចុះពិនិត្យមើលសកម្មភាពកំចាត់មីន ក្នុងភូមិសាស្ត្រឃុំពង្រ ស្រុកម៉ាឡៃ ខេត្តបន្ទាយមានជ័យនាពេលនោះ នាយឧត្តមសេនីយ៍ មាស សុភា បានកោតសរសើរចំពោះស្មារតី លះបង់ខ្ពស់ ប្រកបដោយភាពគ្រោះថ្នាក់ របស់កងកម្លាំងបោសសំអាតមីនទី១ CMAC ក្នុងតំបន់ស្រុកម៉ាឡៃ ដើម្បីរំដោះដីធ្លីជូនប្រជាពលរដ្ឋ ។ ឯកឧត្តម ទេសរដ្ឋមន្រ្តី មាស សុភា បានក្រើនរំលឹកដល់បងប្អូនកងកម្លាំងដោះមីនរបស់CMAC ក្នុងពេលប្រតិបត្តិការការងារ ត្រូវមានការប្រុងប្រយ័ត្នខ្ពស់ ជៀសវាងគ្រោះថ្នាក់ដោយសារការដោះមីន ដោយការធ្វេសប្រហែស។ ឯកឧត្តម ទេសរដ្ឋមន្ត្រី មាស សុភា បានបញ្ជាក់ថា៖ ដោយសារសង្គ្រាម គឺបានបន្សល់គ្រាប់មីនគ្រប់ប្រភេទនៅក្នុងដីជាច្រើន ដែលបង្កហានិភ័យដល់អាយុជីវិតប្រជាជន។ ជាមួយគ្នានោះដែរ ឯកឧត្តម ទេសរដ្ឋមន្រ្តី មាស សុភា ជំនួសមុខឱ្យប្រមុខរាជរដ្ឋាភិបាលកម្ពុជា ក៏បានថ្លែងអំណរគុណផងដែរ ដល់អង្គការ gmac ជប៉ុន ដែលរហូតមកបានជួយឧបត្ថម្ភគាំទ្រ ទាំងស្មារតីសម្ភារៈថវិកា ជាលក្ខណៈមនុស្សធម៌ ជួយដល់សកម្មភាពបោសសំអាតមីន រំដោះដីធ្លីជូនប្រជាជនកម្ពុជា ព្រមទាំងបានជួយអប់រំដល់ប្រជាពលរដ្ឋ ឲ្យយល់ដឹងអំពីភាពគ្រោះថ្នាក់ដោយសារគ្រាប់មីន និងយុទ្ធភ័ណ្ឌមិនទាន់ផ្ទុះ ដែលនេះគឺជាការរួមចំណែកមួយក្នុងការជួយអភិវឌ្ឍន័៍ប្រទេសកម្ពុជា ឲ្យមានការរីកចម្រើន។ នាយឧត្តមសេនីយ៍ មាស សុភា ក៍បានចែកនូវអំណោយដល់ជនពិកាក្នុងស្រុកម៉ាឡៃចំនួន២៥នាក់ ដែលម្នាក់ៗ អង្ក២៥kg, ទឹកសុទ្ធ១កេះ, មី១កេះ, និងថវិការ១០ម៉ឺនរៀលផងដែរ ៕
