សិក្ខាកាមវគ្គបំប៉នការងាររដ្ឋបាល និងឋានលេខា ចុះអនុវត្តជាក់ស្តែងភូមិសាស្រ្តខេត្តកំពង់ស្ពឺ
ក្នងគោលបំណងដើម្បីអោយសិក្ខាកាម ក្នុងវគ្គបំប៉នការងាររដ្ឋបាល និងឋានលេខា (វគ្គពិសេស) សម្រាប់ឆ្នាំសិក្សា២០១៨-២០១៩ របស់អគ្គលេខាធិការ ក្រសួងការពារជាតិ បានយល់កាន់តែច្បាស់អំពីមុខវិជ្ជាឋានលេខា គណៈកម្មការដឹកនាំគ្រប់គ្រងការងារហ្វឹកហ្វឺន ដឹកនាំដោយ ឯកឧត្តម ឧត្តមសេនីយ៍ឯក ប៉ែន ផលពិសិដ្ឋ អគ្គលេខាធិការរង ក្រសួងការពារជាតិ ប្រធានគណៈកម្មការដឹកនាំគ្រប់គ្រងការងារហ្វឹកហ្វឺន និងជាតំណាង ឯកឧត្តម អគ្គលេខាធិការក្រសួងការពារជាតិ និងឯកឧត្តម ឧត្តមសេនីយ៍ទោ ខៀវ ប៊ុនធឿន ប្រធានអនុគណៈកម្មការដឹកនាំគ្រប់គ្រងការងារហ្វឹកហ្វឺន បានដឹកនាំសិក្ខាកាមប្រមាណជាង២០០នាក់ ចុះធ្វើកម្មសិក្សាហ្វឹកហាត់ នៅទីលានជាក់ស្តែង ស្ថិតនៅក្នុងភូមិសាស្រ្ត ឃុំមហាសាំង ស្រុកភ្នំស្រួច ខេត្តកំពង់ស្ពឺ។
ឯកឧត្តម ឧត្តមសេនីយ៍ទោ ខៀវ ប៊ុនធឿន បានអោយដឹងថា៖ គោលបំណងចុះមកធ្វើ កម្មសិក្សានៅលើទីលាននាពេលនេះ គឺមានបំណងចង់អោយសិក្ខាកាមទាំងអស់បានយល់ច្បាស់ពីមុខវិជ្ជាឋានលេខា នៅលើភូមិសាស្រ្តជាក់ស្តែង អោយសិក្ខាកាមអាចចេះវាយតំលៃនូវអ្វីជាលក្ខណៈភូមិសាស្រ្តយោធា អោយចេះអំពីការហៅ និងរកនូវនិយាមការ និងការប្រៀបធៀប ចំណុចនៅលើផែនទី និងនៅលើភូមិសាស្រ្តជាក់ស្តែង។ ឯកឧត្តម ខៀវ ប៊ុនធឿន បានបញ្ជាក់អោយដឹងថា៖ វគ្គបំប៉នការងាររដ្ឋបាល និងឋានលេខា មានរយៈពេល១០ខែ ដែលបានដំណើរការហ្វឹកហ្វឺនរៀនសូត្រចាប់ពីខែមេសា ឆ្នាំ២០១៨ និងត្រូវបញ្ចប់វគ្គនៅក្នុងខែកុម្ភៈ ឆ្នាំ២០១៩នេះ ដើម្បីបង្កើននូវសមត្ថភាពយល់ដឹងបន្ថែមលើការងារគ្រប់គ្រងរដ្ឋបាល និងឋានលេខា ដល់នាយទាហានក្នុង ខ.ភ.ម។
មានប្រសាសន៍សំណេះសំណាល និងផ្តាំផ្ញើដល់សិក្ខាកាមវគ្គបំប៉នការងាររដ្ឋបាល និងឋានលេខា ដែលបានចុះអនុវត្តន៍ ហ្វឹកហាត់នៅលើទីលានជាក់ស្តែងក្នុងខេត្តកំពង់ស្ពឺ នាឱកាសនោះ ឯកឧត្តម ឧត្តមសេនីយ៍ឯក ប៉ែន ផលពិសិដ្ឋ បានសំណូមពរដល់សិក្ខាកាមទាំងអស់ត្រូវយកចិត្តទុកដាក់ខិតខំរៀនសូត្រ ស្តាប់គ្រូពន្យល់ ពីព្រោះថា៖ មុខវិជ្ជាឋានលេខានេះ ជាមុខវិជ្ជាមួយ ដែលមានសារៈសំខាន់ និងមិនអាចខ្វះបាននៅក្នុងខ.ភ.ម ក្នុងការចូលរួមចំណែកដល់ កិច្ចការពារបូរណភាពទឹកដី ជាតិមាតុភូមិទាំងមូល។ ឯកឧត្តម ប៉ែន ផលពិសិដ្ឋ ក៏បានសំណូមដល់សិក្ខាកាមទាំងអស់ ត្រូវចេះសហការ សាមគ្គីគ្នាក្នុងពេលហ្វឹកហាត់ ត្រូវចេះចែករំលែកបទពិសោធន៍ និងចំណេះដឹងពីគ្នាទៅវិញទៅមក ធ្វើយ៉ាងណាអោយពេលបញ្ចប់ទទួលបានលទ្ធផលល្អទាំងអស់គ្នា ៕
